المايسترو اللي بيعمل التوليفات دي هو العمود الفقري لأي محل أو مطحن بن.

 

 

المايسترو اللي بيعمل التوليفات دي هو العمود الفقري لأي محل أو مطحن بن. شغله مش مجرد يخلط كام نوع بن وخلاص… لأ، ده لازم يطلعلك نفس الطعم والجودة كل مرة، ودي أصعب حاجة. ليه؟ عشان البن في مصر كل مرة ييجي مختلف! مرة درجة التحميص مش زي المرة اللي قبلها، مرة الحبوب حجمها غير، مرة المزرعة غير أو المعالجة مختلفة.

والتاني بقى، الزبون المصري عايز كيلو البن بـ 450 أو 500 جنيه، وربع كيلو بـ 140، ويشرب فنجان يفتح النفس ويشم ريحة تخليه يعيش الدور! طب يعمل إيه اللي بيعمل التوليفة؟ قدامه اختيارات محدودة: إندونيسي فيه 45 عيب، حبشي لقمتي، برازيلي، فيتنامي… ويلا بقى يا فنان طلع منهم طعم حكاية وما تعديش التكلفة 400 جنيه!

غير بقى المشاكل الفنية: تراب مالي المكان، رطوبة وحرارة، المحل مفيهوش تهوية ولا تكييف، والمطحنة العجوز اللي ممكن تطلعلك طحن غير التاني.

وفوق ده كله… الراجل شغال بالساعات، مرتبه مش قد تعبه، ضغط شغل رهيب، عايش يوم بيوم، ومع ذلك بيصحى كل يوم يحاول يعمل أحلى حاجة عنده.

وبرغم كل ده، الفنان ده مش بيستسلم. بالعكس… بيكمل، بيبدع، ويثبت إن الشغف بيكسر أي صعب. وده اللي بيخلي فنجان القهوة اللي في إيدك ليه طعم تاني.

تحية من القلب لكل فنان قهوة بيكافح وبيفرحنا بنجاحاته